Ako’y Babalik

Naniniwala ako na wala namang perpektong relasyon. Lahat naman nagbabago, feelings nga nagbabago. At yung relasyon namin, dinaig pa yung mga magkarelasyon na Long Distance Relationship sa sobrang layo namin sa isa’t isa.

Long Distance Relationship. 

Pilit kong nilayo ang sarili ko sa Kaniya. Napapagod na kasi akong sundin Siya. Ang gusto kasi Niya gawin ko ‘to, gawin ko yan. Di ako nakikinig kahit alam kong para sa ikakabuti ko ang laging nasa isip Niya. Kaya lang, ang gusto ko.. ako lagi ang masusunod, “LIKE A BOSS” ika nga. Pakiramdam ko tuloy di ako karapat-dapat na mahalin Niya kaya napagod na kong ibigay ang oras at panahon ko sa Kaniya.

Sa mga panahon na lumayo ako, mas pinili kong ibigin ang ibang bagay na alam kong saki’y magpapasaya. Sa isip ko, di naman Niya makikita dahil malayo naman ako sa Kaniya. Dumating tuloy sa punto na gusto ko ng iwan at bitawan na lang Siya.

Kaya lang, mali ako. Di ko pala kaya.. Kasi kailangan ko Siya.

Kailangan kong bumalik.

Di ko dapat Siya nilayuan. Di ko dapat Siya binalewala. Di ko dapat Siya sinuway. Di ko dapat hinayaan na tuluyang manlamig ang pag-ibig ko sa Kaniya. At higit sa lahat, di ko dapat Siya sinaktan. Oo, dumating sa puntong nagsisisi ako at nasabi ko sa sarili ko na “kulang ako kapag wala Siya dahil HINDI KO KAYANG MAG-ISA.”

Kailangan kong bumawi. Kailangan kong lumaban dahil ni minsa’y di Niya ko sinukuan at binitawan. Kaya kailangan kong ibalik ang dating pag-ibig ko sa Kaniya. Ang pag-ibig na tulad ng sa simula nung mahal na mahal ko pa Siya.

Ikaw, kumusta ang relasyon niyo?

‘Love the Lord your God with all your heart and with all your soul and with all your mind.’  This is the first and greatest commandment.

– Matthew 22:37-38